Nazare Hue Hain Ishaare Hue Hain
nazare hue hain ishaare hue hain
hum un ke hue wo hamare hue hain
hamein to bhale lagte hain aur bhi ab
wo zewar ko apne utare hue hain
nahin pas kuchh ek dil hai so wo bhi
qimar-e-mohabbat mein haare hue hain
maze wasl mein jo uThae the ai dil
judai mein ab wo hi aare hue hain
hamein hosh hai ab kahan tan-badan ka
ki 'majzub' un ke pukare hue hain
Khwaja Aziz-ul-Hasan Majzuub 
(438) Peoples Rate This