KHatm Hoga Ab Safar Pesh-e-nazar Hai Ru-e-dost

KHatm hoga ab safar pesh-e-nazar hai ru-e-dost

aa rahi hai aaj ki manzil se mujh ko bu-e-dost

aage aage hasraten aur pichhe pichhe main chala

is tarah ghar se nikal kar ja raha hun su-e-dost

pahle to dil ne jigar ki jaan na-qadri se li

DhunDhta phirta hai aalam bhar mein ab pahlu-e-dost

wah-ri qismat ki gardun par sahar hone lagi

go paDe the mere bazu par abhi gesu-e-dost

KHud-baKHud meri rag-e-gardan phaDak uThti hai aaj

kar raha hai koi zikr-e-quwwat-e-bazu-e-dost

lafz jo dil ki talab mein tha wo bilkul sehr tha

baaton hi baaton mein mujh par chal gaya jadu-e-dost

koi diwana chala hai hashr mein is waza se

chaak ta-daman gareban munh pe KHak-e-ku-e-dost

dil se mujh ko saf saf aaKHir ye kah dena paDa

ab wahi saKHti bhi jhele jo bigaDe KHu-e-dost

ho agar zinda tum ai 'alim' to ab hoshyar ho

kab talak soya karoge thak gaya zanu-e-dost