Hath Jab Mausam Ke Gile Ho Gae Hain

hath jab mausam ke gile ho gae hain

zaKHm dil ke aur gahre ho gae hain

banTte the jo bahaar-e-zindagani

band ab wo bhi dariche ho gae

Dub jaega hamare sath wo bhi

ye jo socha hath Dhile ho gae hain

laj rakhni paD gai hai doston ki

hum bhari mahfil mein jhuTe ho gae hain

ai gham-e-mazi tujhe main nazr kya dun

KHushk aankhon ke kaTore ho gae hain

ab madad KHar-e-bayaban hain karenge

sadd-e-rah pairon ke chhaale ho gae hain

so sakega wo bhi 'aKHtar' chain se ab

hath beTi ke jo pile ho gae hain